Bókmenntahátíð í Reykjavík 2021

Hátíðin fer fram dagana 8.-11. september. Bókmenntahátíð í Reykjavík hefur starfað síðan árið 1985. Þessi huggulega hátíð er fundarstaður lesenda og höfunda og lifandi vettvangur umræðna um bókmenntir, skáldskap, þjóðfélagsleg málefni og ýmislegt fleira því bókmenntirnar snerta á mörgu og umfjöllunarefnin eru óteljandi. Ókeypis er inn á viðburði og þeir eru öllum opnir. Samtöl fara fram á ensku en upplestrar á móðurmáli höfunda. Í ár erum við sérstaklega spennt að heyra upplestur Egils Bjarnasonar en hann verður í Iðnó kl 19 föstudaginn 10.september. Egill Bjarnason er blaðamaður og höfundur og hefur fjallað um Ísland í fjölmiðlum víða um heim. Nýverið gaf hann út bókina How Iceland Changed the World: The Big History of a Small Island.

Drengurinn sem dó úr leiðindum

Ný bók frá Bókaútgáfunni Sæmundur! Drengurinn sem dó úr leiðindum er saga um nútímakrakka. Bestu símarnir, skemmtilegustu tölvuleikirnir og hangs á netinu er það sem mestu máli skiptir í lífinu. Heimur Kára Hrafns, venjulegasta tólf ára stráks í heimi, hrynur þegar foreldrar hans taka frá honum öll snjalltæki og afhenda honum í staðinn skærgulan farsíma sem hæfir bara risaeðlum. Þá gerist það sem hlaut að gerast: Kári Hrafn hreinlega deyr úr leiðindum! Og hvað tekur þá við? Sagan fjallar um vináttu, fjölskyldu og allt annað milli himins og jarðar sem skiptir máli. Guðríður Baldvinsdóttir er sauðfjárbóndi og frumkvöðull í Kelduhverfi. Hún hefur áður sent frá sér barnabókina Sólskin með vanillubragði.

Satína hin fagra

Út er komin ljóðabókin Satína hin fagra eftir Steinunni Arnbjörgu Stefánsdóttur. Hræsnin mín hvað væri ég án þín? Dauð í niðurfalli, rottunnar rotnandi hræ. Ekki krosshangi: hold hverfandi í svaðinu. Vertu áfram hjá mér. Satína hin fagra er fjórða ljóðabók Steinunnar sem er tónlistarkona og skáld.

Bókakaffid.is

Við höfum opnað nýja heimasíðu í samstarfi við netheim. Síðan sameinar netbókabúðina gömlu og Bókakaffið endanlega saman í eitt en hér finnur þú stærsta úrval landsins af notuðum bókum og leggjum við okkur fram um að aðstoða þig við að leita að þeirra bók sem þú óskar eftir. Undir sama þaki er síðan Bókaútgáfan Sæmundur sem getur út nokkra tugi bóka á ári og ætlum við að flytja fréttir af þeim sem og aðrar fréttir úr bókmenntalífi landans.

Þríleikur Bjarna um Skálholt í einni kilju

Sagnabálkurinn Síðustu dagar Skálholts eftir Bjarna Harðarson spannar aldarlanga sögu Skálholtssveita. Sagan er hér sögð frá sjónarhóli fátækra landseta stólsins og lýsir kjörum þeirra og lífi. Við sögu kemur fjölskrúðugt persónusafn, allt frá biskupum og fyrirmennum til kotafólks og soðbúrskerlinga. Einna fyrirferðarmest verður þó skringimennið síra Þórður í Reykjadal sem á sér þann draum að sjá Skálholtsstað brenna einu sinni enn en hefur ekki uppburði til að kveikja þá elda. Móðuharðindi, jarðskjálftar og almenn ringulreið 18. aldar taka að lokum að sér að greiða staðnum náðarhöggið og í Sultartungum verður ekki annað eftir en þau strá sem eru aldrei nema strá. Frumgerð sögunnar kom út í þremur bókum, Í skugga drottins, Í Gullhreppum og Síðustu dagar Skálholts, á árabilinu 2017–2020.

Með grjót í vösunum eftir Svein Torfa Þórólfsson

Sveinn Torfi Þórólfsson (1945–2016) ólst upp á Skagaströnd til tíu ára aldurs en fluttist þá til Grindavíkur með fjölskyldu sinni. Lífsbaráttan var hörð og oft var mikið lagt á hans ungu herðar. Hann vann í fiski, fór í sveit og stundaði sjómennsku frá barnsaldri. Sveinn braust af eigin rammleik til mennta. Hann var fyrst á Laugarvatni en síðan í háskólum á Íslandi og í Noregi þar sem hann settist að og starfaði sem verkfræðingur og prófessor. Hér segir Sveinn Torfi frá æskuárunum á Skagaströnd þar sem hugmyndaflugið fékk að njóta sín í fjölbreyttum leikjum og síðan ljúfri dvöl í sveit á Höskuldsstöðum — en einnig harðneskjulegum unglingsárum. Með grjót í vösunum geymir minningar um horfinn tíma og svipmyndir af eftirminnilegu fólki. Þetta er mikilsverð og bráðskemmtileg heimild um íslenskan veruleika um miðja síðustu öld. Útgefandi er Bókaútgáfan Sæmundur á Selfossi.

Hylurinn – ný bók

Hylurinn er dramatísk og spennandi saga af heillandi mannlífi, andlegum þroska, ástum og fallegri vináttu.Sögumaðurinn Snorri, hinn guðumlíki Stefán og sjálfmenntaði nuddarinn Kolfinna í Borgarnesi eru þríeyki sem í sameiningu vinna kraftaverk. Við kynnumst líka systkinunum Kára og Sólrúnu sem rænd voru æsku sinni og hafa sloppið naumlega undan illum og ósanngjörnum örlögum. Hylurinn er fyrsta bók Gróu Finnsdóttur sem hefur yfir að ráða næmum og fallegum stíl.Bókin er gefin út af Bókaútgáfunni Sæmundur 2021.

Þvílíkar ófreskjur – ný bók

Þvílíkar ófreskjur, – með þeim orðum um rímnakveðskap setti Jónas Hallgrímsson tóninn fyrir íslenska ritdómara. Titill bókarinnar vísar til hins tvíbenta hlutverks ritdómarans: að vera í senn skrímsli og bjargvættur á bókmenntasviðinu. Sérstakur gaumur er gefinn að þætti kvenna í þeirri sögu og í lokin er velt upp spurningum um framtíð ritdóma í nýju, tölvuvæddu umhverfi.¨ Auður Aðalsteinsdóttir heldur útgáfuhóf í dag kl 17, Mál og menningu Laugavegi 18. Allir velkomnir.

GADDAVÍRSÁTIÐ og aðrar sögur

og aðrar sögur

Gaddavírsátið er heiti bókar Jochum Magnúsar Eggertssonar sem tók sér listamannsnafnið Skuggi og var áberandi í bæjar- og menningarlífi Reykjavíkur um miðja síðustu öld. Hann var þekktur fyrir þrasgirni, skáldskap, fræðastörf og frumlegar kenningar um landnám Íslands. Frægastur er Skuggi fyrir Galdraskræðu sína sem enn er í hávegum, hér á landi og erlendis, en alls gaf hann út á þriðja tug rita og ritlinga um ýmis málefni. Þekktasta smásaga Skugga er Gaddavírsátið, sem segir af lausamanni í Nýja-Jórvíkurhreppi sem leggur sér gaddavírsrúllu til munns.Í bókinni eru að auki sögurnar þrjár af Guðmundi Kristmannssyni, verðlaunasaga Skugga af trýnaveðri fyrir vestan, sagan af stórveldum Stefáns Bjarnasonar, sönn saga úr Skjóðufirði og Reykjavíkursaga af yfirnáttúrulegum marhnúti. Árni Matthíasson tekur æviferil Jochums í inngangi bókarinnar.

Sögur úr síðunni

Þrettán myndir úr gleymsku

Sögur úr síðunni er heiti bókar Böðvars Guðmundssonar en í henni eru þrettán tengdar sögur sem allar gerast í einni og sömu sveitinni á áratugunum um og eftir seinni heimsstyrjöld. Við kynnumst fjölda eftirminnilegra persóna, bændum og búaliði, brúarvinnukörlum og gestkomandi fólki, sem lýst er af leiftrandi kímni og svo miklu næmi að lesanda finnst hann nauðaþekkja þetta fólk. Sögur úr síðunni opna lesendum glugga inn í horfinn heim sem er býsna framandi þótt hann sé ekki ýkja fjarlægur í tíma, heim íslensks sveitalífs um það bil sem „allt landið er að búa sig undir að flytja til Reykjavíkur án þess að gera sér grein fyrir því“. Böðvar Guðmundsson þarf vart að kynna fyrir íslenskum bókmenntaunnendum. Eftir hann liggur fjöldi ritverka, smásögur, ljóð, leikrit og skáldsögur sem notið hafa hylli landsmanna. Sögur úr síðunni komu fyrst út árið 2007 og hlutu frábærar viðtökur.